Taramundi, un conceyu d'alcaldes socialistes

El retu, entá por consiguir, ye afitar población

Eduardo Lastra tuvo 32 años al mandu de l'alcaldía de Taramundi. Lastra convirtióse  nel primer rexidor del conceyu en 1979 como independiente. Yeren les primeres elecciones y taba too por faer.

En 1982, yá afiliáu al Partido Socialista, volvería ganar nes urnes. Y asina hasta siete vegaes más, con mayoría absoluta. La llegada del turismu rural al conceyu foi unu de los sos grandes llogros.

Lastra separtóse  de l'alcaldía cuatro años pa exercer de director xeneral del Institutu de Desarrollu Rural. Nesti tiempu coyó'l cayáu de mandu la tamién socialista Celia Prieto. Ente 2003 y 2007. Nesi periodu'l conceyu llogró la declaración de Zona d'Interés Artesanal.

Y otru finxu, unu de los rincones más conocíos de Taramundi, Os Teixóis, convirtióse en Bien d'Interés Cultural.

Sicasí, el retu d'afitar población, unu de los oxetivos fundamentales, nun foi posible consiguilu.

El PSOE gobernó equí prácticamente toles llexislatures, sacante la primera, con mayoría absoluta. Tamién la algamó en 2015 César Villabrille. Esta ye la so segunda llexislatura como rexidor, coles mires de caltener lo yá llograo.

Lastra, Prieto y Villabrille, toos ellos, alcaldes que fueron nel so momentu los verdaderos artífices del despegue d'un conceyu que busca agora siguir mirando al futuru.