Taramundi, un conceyu venceyáu a l'artesanía

Una ventena de vecinos dedíquense a la fabricación de cuchiellos y navayes

A principios del sieglu XIV llegaron a tar abiertos en Taramundi unos 100 talleres d'artesanía. Una palabra venceyada dafechu a un conceyu onde munchos de los sos vecinos ganaron la vida cosiendo; faciendo navayes o faciendo cestes. Anguaño esa actividá foi a menos, pero la so importancia nel conceyu valió-y pa recibir la denomación de Zona d'Interés Artesanal.

Perdiéronse munchos de los oficios, menos el rellacionáu cola fabricación de cuchiellos y navayes. ¿Quién nun tien na so casa una navaya de Taramundi? Güei una ventena de vecinos dediquénse a ello. 'Cuchillería de Taramundi' ye la empresa más grande del conceyu. Son siete emplegaos que llogren faer al añu 19.000 cuchiellos y 12.000 navayes.

Chefs d'alta cocina encarguen modelos específicos que-yos entaínen el trabayu, pero calteniendo la tradición d'un productu d'elevada calidá. Tamién van pal estranxeru.

Ye un sector en puxu qu'inda atopa competencia nel sector primariu. La ganadería y l'agricultura dan empléu a la metá de vecinos n'edá de trabayar. La ellaboración de quesu tamién tien la so importancia que s'amuesa nuna feria que cada Selmana Santa atrái a Taramundi a muncha xente.