Teresa Mallada y Mercedes Fernández consideren a Canga un bon candidatu

Ciudadanos y Vox ufiértense al PP de Diego Canga pa desbancar al PSOE

Ensin ser entá proclamáu como candidatu a la presidencia del Principáu d'Asturies Diego Canga yá consiguió axuntar a los populares asturianos so la so figura. La prueba d'ello ta na valoración que del futuru cabeza de cartelu popular fixeron les dos últimes presidentes del PP n'Asturies.

Teresa Mallada non solo nun emponderó a Diego Canga sinón qu'aseguró que foi unu de los nomes qu'ella propunxo al presidente nacional, Alberto Núñez Feijóo.

Dende'l grupu parlamentariu destaquen la trayectoria de Canga, siempres, dicen, volcáu n'Asturies.

Esti miércoles el Comité Executivu de los populares asturianos va proponer al comité electoral nacional que ratifique a Diego Canga como'l candidatu a les elecciones autonómiques.

Ciudadanos y Vox ufiértense al PP de Diego Canga pa desbancar al PSOE

Dende Vox yá ufiertaron los sos votos al PP pa vencer al PSOE nos próximos comicios. La formación yá avanza que sofitaría un cambéu de Gobiernu n'Asturies.

Dende Ciudadanos, señalen que l'oxetivu ye superar al partíu socialista y allaben el candidatu escoyíu polos populares.

Más críticu foi Foro. La formación de Moriyón cree que'l PP tendría que tar esmolecíu porque s'opte por una persona que nun milita nes sos files y que, al so xuiciu, nun conoz el día ente día d'Asturies.

Diego Canga siéntese "preparáu" pal retu

Diego Canga asegura que se siente "preparáu" pa encarar la candidatura y considera a Antonio Tajani, del que foi xefe de gabinete, el so maestru.

Díxolo en respuesta a un tuit del Vicepresidente y ministru d'asuntos esteriores d'Italia nel qu'ésti-y deseyaba bona suerte. Tajani destaca de Canga que ye una persona lleal, competente y bien bonu resolviendo problemes difíciles.

Canga, agradeció-y el tuit y diz sentise preparáu pal retu dempués d'una década al llau d'él nos llugares más difíciles. N'otru tuit en respuesta al secretariu xeneral del PP asturianu, Canga señala que ta deseyando llegar a Asturies pa cambiar l'aldu de la rexón.