Tino Bermúdez, del activismu sindical al vecinal en Xixón

Testigu de la nacencia de la Federación d'Asociaciones de Vecinos fai 40 años

L.lenense de nacencia, xixonés d'adopción, Tino Bermúdez forxó na mina'l so calter de lluchador. Fízolo al traviés de l'actividá sindical en defensa de los derechos de los sos compañeros y escontra un réxime, el de Franco, que terminó aplicándo-y la llei antiterrorista, lo que lu obligó a dexar a la so familia y exiliase en Francia.

Muertu Franco, Tino instálase definitivamente en Xixón. Ye entós cuando s'embarca nuna segunda llucha: la del activismu vecinal. Él foi testigu de los entamos d'esti movimientu en Xixón y de la nacencia, fai 40 años, de la Federación d'Asociaciones de Vecinos, cuando cuasi too taba por faer.

Ente los llogros que más ilusión-y faen ta la puesta en marcha de la cooperativa de viviendes qu'ayudó a xestionar dende la federación vecinal.

Convencíu de que nada s'algama si nun ye lluchando, nun hai reivindicación en Xixón na que Tino nun participara. Dende la construcción d'una escuela 0-3 nel so barriu de Montevil, hasta la instalación nel hospital de Xove d'un serviciu de radioterapia.

Una esmolición pa meyorar la vida de los sos vecinos que tamién amosó n'otra de les sos grandes pasiones: la escritura.

A los sos 75 años asegura que nun perdió nada del so calter reivindicativu. Eso sí, sigue esperando qu'una nueva xeneración d'activistes vecinales tome'l relevu pa siguir dando voz a la ciudadanía al respective de les grandes decisiones que tean por tomar en Xixón.