Tolos grupos, menos IX, presenten enmiendes a la totalidá de los presupuestos

El Gobiernu ve "tiempu" p'axustar con Podemos hasta votar el presupuestu

El grupu parlamentariu de Podemos Asturies presentó una enmienda de totalidá a los presupuestos del Principáu pa 2018, que la formación morada ufierta retirar si'l Gobiernu acepta garantizar la gratuidá de les actuales escueles infantiles de 0 a 3 años a partir del próximu 1 de xineru.

El Gobiernu yá incluyera nel so proyectu una rebaxa de tases d'esos centros d'hasta'l 50% de manera que los cuatro millones d'euros qu'apurren añalmente les families amenorgaríen a la metá, una cuantía que la formación morada ve posible asumir dientro d'un presupuestu de 4.885 millones d'euros.

L'aportación d'esos fondos podría facese inclusive dempués de l'aprobación de los presupuestos si'l Gobiernu rexonal acepta llevala alantre por aciu d'un cambéu de creitu y comprométese amás a que'l futuru modelu que tien previsto diseñar pa la rede de 0 a 3 años, refugue cualquier posible privatización.

El conseyeru de Presidencia y Participación Ciudadana , Guillermo Martínez, consideró un "erru" que Podemos presente una enmienda a la totalidá a los presupuestos rexonales pa 2018. Indicó que nun cierren la puerta nin dan la espalda al diálogu, porque "hai tiempu" p'axustar hasta que se vote'l presupuestu.

"Fiximos importantes cesiones y agora ye Podemos quien tien qu'escoyer ente la responsabilidá con Asturies y la rensía cola izquierda y el PSOE", sostuvo Martínez, quien remarcó que la disposición del Gobiernu "tuvo, ta y va tar siempres del llau del alcuerdu".

Sacante IX, tolos grupos de la oposición presentaron enmiendes a la totalidá. Foro y PP anunciáronla tamién esta mañana y Ciudadanos fai dellos díes.

Esto nun día nel que la FSA-PSOE y IX-Asturies anovaron el so "enfotu perdíu" tres la rotura del alcuerdu d'investidura, cola firma d'un pactu que trai'l sofitu de los cinco diputaos de la coalición al presupuestu de 2018. L'alcuerdu foi robláu güei polos máximos responsables de dambes formaciones, Adrián Barbón y Ramón Argüelles.