Tres años de prisión pa Fernández Villa por apropiación indebida de los fondos del SOMA

La sentencia condérgalu amás a pagar una multa de 24.000 euros y a indemnizar al sindicatu con 431.330 euros

L'ex-secretariu xeneral del SOMA-UXT José Ángel Fernández Villa foi condergáu a una pena de tres años de prisión y al pagu d'una multa de 24.000 euros por un delitu siguíu d'apropiación indebida con fondos del sindicatu mineru.e

La sentencia de la Sección Tercera de l'Audiencia provincial d'Asturies conderga amás al ex-dirixente sindical y políticu a indemnizar al SOMA-UXT, que dirixó más de trés décades, con 431.330,77 euros en conceutu de daños y perxuicios.

Según informa'l TCXA, la sentencia declara como probao, ente otres coses, que l'acusáu, entós secretariu xeneral del Sindicatu, "que representaba y dirixía, prevaliéndose de la so posición xerárquica sobro'l restu de miembros y trabayadores del mesmu, que nun poníen en dulda nin aldericaben les sos decisiones o simples deseos, aprobando inclusive la so xestión, dalgunos, seique, por desconocimientu, llogró percibir les cantidaes reseñaes nos fechos declaraos probaos d'esta sentencia, perxudicando'l patrimoniu del Sindicatu y encaxando la so conducta nes dos modalidaes del delitu d'apropiación indebida". Pa los maxistraos esti delitu tien qu'apreciase col calter de siguíu "que naz d'una pluralidá d'acciones que, individualmente contemplaes, son susceptibles de ser calificaes como delitos independientes, pero que, dende una perspectiva de antixuricidá material, preséntense como una infracción unitaria, xuntándose tolos requisitos que'l Tribunal Supremu esixe pa la so esistencia".

La sentencia que nun ye firme y pue ser recurrida en casación énte'l Tribunal Cimeru, esplica nesi mesmu sen que l'agora condergáu "fixo so y destinó'l dineru del Sindicatu pa los sos propios gastos, utilizando los recursos ayenos nel so provechu y beneficiu esclusivu, estendiéndose esa conducta años y llevándose alantre de delles maneres y formes y por distintes cantidaes cada vez".

L'Audiencia apunta que nun hai unidá natural d'acción, "precisamente pola variedá de les modalidaes poles que l'acusáu distrái y fai so'l dineru del Sindicatu, como tamién la duración del períodu de tiempu nel que lo fai, lo suficientemente llargu como pa romper precisamente esa unidá temporal d'acción y asitianos más bien énte distintes actuaciones que puen ser consideraes como un delitu siguíu".

Tocante a la pena de prisión impuesta, la sentencia esplica que "tamos énte una apropiación por un importe de 434.158,43 euros, que supera en más d'ocho vegaes la prevista pa la cualificación, nuna conducta d'infidelidá que s'estiende a lo llargo'l tiempu, del 1989 al 2012, y ello por quien ostenta puestos de singular importancia sindical y política polo que la gravedá cuantitativa y les condiciones personales del so autor xustifiquen la imposición d'una pena de prisión de tres años".

Fiscalía y acusación particular, que pidíen cinco y seis años de prisión respectivamente, y una multa cimera, yá anunciaron que nun piensen recurrir la sentencia. L'acusación particular, que representa al SOMA, considera que'l fallu ye positivu porque tolos fechos quedaron probaos.

El fallu torna toles cuestiones previes plantegaes pola defensa de José Ángel Fernández Villa. Especial enfotu fai na llocura sobrevenida. Considera'l tribunal que l'acusáu ta en plenitú de les sos facultaes mentales, pudiendo entender y espresase, anque careza amnesia más o menos intensa sobro los fechos imputaos.

L'amnesia, diz l'Audiencia, nun equival a llocura sobrevenida. Según el fallu, nel xuiciu quedó demostrao que Fernández Villa nun tien un déficit cognitivu que torgue la so comparecencia.