Ultimátum del Gobiernu a Alcoa

La compañía ufierta un apagáu ordenáu de les cubes d’electrólisis

La ministra d’Industria, Reyes Maroto, dio anuncia de que’l Gobiernu dio un ultimátum a Alcoa, a la qu’acusa de bloquiar la negociación pa evitar el pieslle de les sos plantes n’A Coruña y Avilés, y esixó-y paralizar l’espediente de despidu ERE y allagar seis meses más les negociaciones pa buscar una alternativa industrial.

Nuna entrevista a la Cadena Ser, Maroto esplicó qu’ayeri algamaron un "documentu de mínimos" pa siguir les negociaciones que’l Gobiernu, la Xunta de Galicia y el Principáu d’Asturies caltienen cola multinacional de los Estaos Xuníos, a la que piden parar l’ERE, acabando’l so periodu de consultes el 15 de xineru viniente.

Según fontes cercanes a les conversaciones, na situación d’anguaño ábrese una nueva vía de trabayu con Alcoa orientada a retrasar la finalización del espediente de regulación de trabayu que la compañía presentó pa 686 trabayadores, mientres se busca, al empar, una solución que garantice la viabilidá de dambes plantes.

Nesti sen, les citaes fontes indicaron qu’esti pidimientu ye’l resultáu del trabayu a comuña ente’l Gobiernu central, los sindicatos y les alministraciones implicaes, qu’ayeri tuvieron aconceyaos na sede del Ministeriu cola empresa seis hores.

Alcoa retruca que ta enfocada nel ERE y ufierta un apagáu ordenáu de les cubes d’electrólisis

Alcoa retrucó a esta propuesta. En declaraciones a TPA Noticies, la multinacional esplica que penriba de too ta enfocada nel periodu de consultes del ERE que tien de plazu hasta’l martes viniente día 15, que yá amplió dos vegaes esti plazu de los 30 díes que marca la llei a los 72 díes, y qu’en más de dos meses nun recibió nenguna ufierta concreta del Gobiernu.

Alcoa amiesta que taría dipuesta a un apagáu ordenáu de les cubes d’electrólisis en collaboración colos trabayadores pa poder reactivales si hubiera un inversor.