Un centenar de persones concéntrense pa despidir a 'Pepe’l Ferreiro'

L’Asociación d’Amigos del Etnográficu de Grandas de Salime consideren que’l muséu tendría que llevar el so nome

Aplausu total en Grandas de Salime pa homenaxar la figura de 'Pepe’l Ferreiro'. Un centenar de persones quixeron despidir a José María Naveiras delantre’l Muséu Etnográficu de Grandas de Salime, y ficiéronlo guardando un minutu de silenciu, siguíu d’un llargu aplausu.

Los vecinos de la zona y amigos definiéronlu como un adelantáu al so tiempu, que creyó na dignidá d’un territoriu y que construyó un muséu que cuenta quién somos.

'Pepe’l Ferreiro' dexa tristeza, pero’l firme compromisu de caltener el so legáu. Dende l’Asociación d’Amigos d’esti muséu consideren que l’Etnográficu de Grandas tendría que llevar el so nome.