Un contratu per un añu pa remocicar viviendes públiques en Xixón, con bones tases de reinxerimientu

Tases de reinxerimientu superiores al 40% nos planes de trabayu xixoneses

Un total de 156 profesionales con torgues p’alcontrar trabayu recualifíquense pente medies de los planes de trabayu de Xixón remocicando 20 viviendes públiques. Ocho yá tán acabaes y axudicaes, en tres trabáyase estos díes y acabarán con otres siete en Cimavilla. Un contratu per un añu con tases de reinxerimientu d’ente’l 40 al 100%, según la especialidá profesional. Una segunda oportunidá que, amás, supón amenorgar costos a Emvisa y dar vivienda de calidá a colectivos vulnerables.

Jorge Enrique Matamoros tien 30 años y ye cuntable pero al llegar d’El Salvador alcontróse con que equí’l so titulu nun valía. Manfredine García siempres foi soldador, tien 60 años. Llevaben el mesmu tiempu desempleaos, dos años, cuando surdió esti modu de reconvertise y recualificase remocicando viviendes pal Ayuntamientu de Xixón.

Son dos de los más de 150 profesionales contrataos per un añu. Planes de trabayu collaborativos, nesti casu, ente dos árees con igual oxetivu: ufiertar segundes oportunidaes, trabayu y vivienda, claves pa l’inxerimientu social.

Financiaos col Principáu, los planes de trabayu lleven un siguimientu semestral que son un éxitu, con una tasa media de reinxerimientu del 40% y que medra al 100% n’especialidaes como la reforma de vivienda y carpintería.