Un regresu mui esperáu a los centros de día

Más midíes de seguridá ente usuarios y trabayadores

Los centros de día privaos d’Asturies entamen a abrir les sos puertes. Fadránlo, los más, esta selmana y con aforu llendáu.

TPA Noticies tuvo en La Pola (Llaviana) pa conocer de primer mano los nuevos protocolos a siguir, pero tamién pa falar colos sos protagonistes, los nuestros mayores, y conocer les sos histories. Ellos son unu de los colectivos más sacudíos pola crisis sanitaria, poro, volver a la rutina, supón tamién dexar de llau la soledá de les sos cases.

Amable Díaz tien 84 años y vive sola, dende que perdió al so home va seis meses. Volver al centru de día ye pa ella un regalu, non solo poles actividaes, tamién pola compañía.

La desinfección nes zones comunes ye total. Como Amable, toos tienen sillones propios, colos sos nomes, con distancies, cola so propia manta y coxín que se desinfecta cada selmana.

Midíes especiales tamién pa les trabayadores, que dempués de pasar un test serolóxicu, trabayen con doble mazcarina, mampara y bata.

Tomar la temperatura a los usuarios, al llegar y al salir, tamién ye clave. Nel casu de detectar cualquier casu sospechosu, tienen una sala aisllada. Son midíes a les que cuesta acostumase, pero lloñe de ser un impedimentu, esplica Amable, da seguridá.

Cumplir con estes normes dexará a tolos centros avanzar na so desescalada y, si too va bien, recuperar darréu l’aforu de davezu y la normalidá.