Un total de 20 persones contaxaes nos centros del ERA n'Asturies

Melania Álvarez pide tranquilidá a usuarios, families y trabayadores

Les residencies de vieyos son unos de los llugares que más esmolecen nesta crisis del coronavirus pola so alta incidencia ente les persones de más edá.

Equí n'Asturies, nos centros del ERA, hai 20 persones contaxaes.

La vocera del Executivu asturianu y conseyera de Derechos Sociales y Bienestar, Melania Álvarez, pidió tranquilidá a usuarios, families y trabayadores.

Lo peor, hasta'l momentu, ta na residencia del ERA de Grau. Nella yá dieron positivu por coronavirus 15 persones: 12 residentes y tres trabayadores. Los residentes afectaos tán ingresaos, dos d'ellos n'estáu grave.

Otru de los centros que más esmolez ye'l de Fuentes del Villar, en Piedrasblancas, al que se movió esta mañana la xerente del ERA, Ana Suárez. Nesta residencia confirmáronse dos positivos por coronavirus: el d'un residente y una trabayadora. Tomáronse amueses a otros 12 usuarios y cinco profesionales. Los cinco tán a la espera de los resultaos nes sos cases.

Tamién hai casos en dos residencies del ERA d'Uviéu. Na de Santa Teresa, una trabayadora foi infestada. Epidemioloxía estudia agora dos de los sos contactos estrechos, aisllaos yá nes sos cases, y 17 causales.

Na d'El Cristo hai otros dos contaxos: un residente y un profesional.

Profesionales que siguen reclamando midíes, ente elles, que los trabayadores que como podólogos y fisioterapeutes que roten per delles residencies dexen de facelo y se-yos dean equipos de protección.

Nello trabaya'l Principáu pero la conseyera de Derechos Sociales alvierte, el so usu va ser restrixíu.

En tolos centros del ERA, asegura Álvarez, cúmplese dafechu'l procedimientu marcáu pola Conseyería de Salú.