Un total de 24 zones de la carretera que xube al puertu San Isidro podríen sufrir ádenes

La Universidá d'Uviéu ellaboró un estudiu nel qu'alvierte sobro'l riesgu d'ádenes na cabecera del ríu San Isidro y la vulnerabilidá de la carretera AS-253 que xube al puertu, na que se detectaron diez tramos de vía con un eleváu peligru.

Los investigadores Miguel Ángel Poblete, Salvador Beato y José Luis Marino, miembros del Observatoriu del Territoriu del Departamentu de Xeografía, identificaron 63 zones d'ádenes, de les que 24 afecten al trazáu de la carretera.

L'estudiu reflexa qu'esisten diez tramos de la vía con un eleváu grau de riesgu d'ádenes, al nun haber midida de protección, polo qu'urxe la "inmediata execución d'acciones preventives".

El trabayu tamién amuesa que nos postreros 30 años hebo un descensu, nos montes medios asturianos, de la cuantía media de les precipitaciones en forma de nieve y el númberu de díes de nieve.

Sicasí, contrariamente a lo que podría inferise, los grandes temporales de nieve siguen siendo mui frecuentes (15 no que va de sieglu) y les precipitaciones d'esi tipu xúntense en pocos díes.

Ente los factores qu'espliquen l'alta frecuencia d'ádenes nel Altu San Isidro, l'estudiu apunta a la fuerte nivosidá, les rimaes  ente 30 y 50 graos y la falta de cubierta forestal nes aguaes meridional y occidental.