Una muyer xustifica l'afayu del so ADN nuna rellación con Ardines

Declaren dos ex-policíes locales y l'antiguu abogáu consistorial de Llanes

L'ADN de la muyer qu'apaeció nel cuerpu y el coche del conceyal d'IX de Llanes Javier Ardines el día en que foi asesináu, el 16 d'agostu de 2018, xustificó esti xueves la presencia del so perfil xenéticu nes relaciones sexuales que caltuvo la viéspora col conceyal y ratificó que la Guardia Civil informó-y d'esti fechu enantes de prestar la so segunda declaración, según informaron les defenses.

La declaración d'esta muyer, que per 45 minutos declaró a puerta zarrada pa caltener la so intimidá, centró parte de la décima sesión del xuiciu con xuráu que se celebra na Audiencia pol que tán acusaos Pedro N.A., como presuntu inductor, Maamar K. y Djilali B. como supuestos sicarios, y Jesús M. como intermediariu, qu'encaren una pena de 25 años de prisión pol asesinatu.

El lletráu Luis Mendiguren, defensor de Jesús M., cuestionó la investigación policial al sostener que la muyer prestó una declaración "contundente” que dexa claro que la Guardia Civil “de dalguna forma dirixóla” sobre ónde y cómo apaeciera'l so ADN.

Na sesión de güei tamién declararon dos ex-policíes locales y l'antiguu abogáu consistorial de Llanes, que confirmaron que n'agostu de 2018 había un conflictu llaboral pol altu porcentaxe d'interinidá que se rexistraba nel consistoriu y la convocatoria darréu d'una ufierta pública d'empléu pa les sos places.

Los tres negaron que'l conflictu llaboral xenerara enfrentamientos personales col conceyal asesináu y ratificaron qu'inclusive l'alcalde, Enrique Riestra, yera quien llevaba “la voz cantante” na mesa de negociación colos funcionarios.