Una radiografía de los refuxaos ucraínos del mayor éxodu n'Europa dende la II Guerra Mundial

Un total de 1.893 protecciones temporales y cuasi 500 neños ucraínos escolarizaos n'Asturies

Na viéspora del segundu aniversariu de la guerra n'Ucraína faemos una radiografía de los refuxaos del mayor éxodu n'Europa dende la II Guerra Mundial. N'España, cuasi 200.000 ucraínos cunten con protección temporal. Ye'l mecanismu especial habilitáu que-yos dexa vivir, trabayar, escolarizase y recibir asistencia médica ensin necesidá de pidir asilu.

N'Asturies, dende l'entamu de la guerra y hasta febreru, diéronse 1.893 protecciones temporales. Según la Conseyería d'Educación, a fecha del pasáu payares, n'Asturies taben escolarizaos cuasi 500 neños ucraínos.

Cruz Roja y Accem son les dos organizaciones que los atienden n'Asturies. La primera nun da datos. Accem sigue atendiendo anguaño n'Asturies a 162 persones movíes pola guerra. Pero non toes cunten con ayuda.

Una madre ucraína residente n'Asturies apunta a un muriu burocráticu pa llegar a ayudes

Fai yá cuasi dos años que María Reznykova y el so fíu pequeñu, qu'agora tien cuatro, viven n'Asturies. El so otru fíu ye mayor d'edá y foi obligáu a quedar n'Ucraína. Ella tien 41 y ye llicenciada n'Económiques pero nun atopó un trabayu acordies a la so formación. Les principales barreres, l'idioma y que los sos estudios nun fueron homologaos.