Unu de cada cuatro pisos turísticos d’Asturies ta rexistráu

Nel Principáu hai rexistraes 2.124 viviendes d’usu turísticu

Les viviendes vacacionales rexistraes amuesen nes plataformes d’espardimientu’l so certificáu VV o VUT, son los menos d’ellos. Namái unu de cada cuatro propietarios nun muestréu de 300 apartamentos fizo los trámites alministrativos obligatorios. Esto indica que nel mercáu hai más de les 2.124 viviendes daes d’alta nel rexistru d’empreses y xeres turístiques del Principáu.

Son illegales y los inspectores podríen sancionales. La regulación d’esta ufierta faise al traviés de les ordenances municipales o nel so defectu de la rexonal, pero dempués de la decisión de la Comisión Nacional de los Mercaos y la Competencia de recurrir esta selmana la normativa sobre viviendes turístiques de Madrid, Bilbao y San Sebastián, el Gobiernu llamó a les autonomíes p’aconceyar y unificar directrices.

Al conceyu dirá’l conseyeru Isaac Pola. La igualdá na calidá de la ufierta de los pisos turísticos y la hotelera, ye la máxima del Gobiernu del Principáu.

Exceltur, l’asociación qu’axunta a les grandes empreses del sector turísticu criticó güei’l recursu de la CNMC y acúsalos de desconocer la revuelta social que tán xenerando los pisos turísticos.