Uviéu va personase como acusación nel casu 'Enredadera'

Moriyón pide un rastrexu "fondu" pa constatar si hai contratos col casu

L'equipu de Gobiernu del Conceyu d'Uviéu alcordó güei dar treslláu de la so propuesta pa la personación como acusación particular na causa penal que se sigue nel Xulgáu d'Instrucción númberu 2 de Badalona pola Operación Enredadera a la Xunta de Gobiernu que se va celebrar a finales d'esta selmana.

Asina lo anunció güei la conceyala Ana Rivas, al términu de la xunta, onde esplicó que los miembros del tripartitu amosaron la so conformidá al informe de l'Abogacía Consistorial onde s'alvierte de la posible esistencia d'irregularidaes que podríen derivar en delitos nes contrataciones de les árees de Policía Local y el Serviciu d'Estinción de Quemes (SEIS) y na necesidá de personase pa defender los intereses municipales.

Ana Rivas aseguró qu'anguaño la situación "camudó" col informe de l'Abogacía Consistorial y el llevantamientu parcial del secretu de sumariu.

D'equí p'alantre va ellaborase l'espediente pa que se faiga la propuesta pa tomar la decisión de personase como acusación particular na causa penal abierta pola Operación Enredadera.

El conceyal de Seguridá Ciudadana, Ricardo Fernández, yá plantegara cambeos na axudicación de los contratos, y l'alcalde yá paralizara les nueves contrataciones, según recordó la conceyala Rivas.

L'equipu de gobiernu “va dar un pasu más”, esplicó, cola fiscalización de los contratos de tol área, tanto de Policía Local, como del Seis, que podría llegar tamién a tar afectáu.

Ana Rivas comentó qu'había un alcuerdu del tripartitu pol que decidió anulase los nomamientos de los directores xenerales y recordó que siguen na mesma tesitura qu'enantes, porque lo que los esmolez ye que se tea dando la sensación de que'l Conceyu necesita recurrir a funcionarios provenientes d'otres alministraciones cuando la puen resolver “colos de casa”.

“Nun vamos almitir que pa resolver el problema d'una posible irregularidá d'un funcionariu haya que traer a funcionarios d'otres alministraciones y nun queremos que s'interprete qu'hai corrupción, yá que defendemos el trabayu de los funcionarios de manera xenérica salvo naquellos casos nos que puea detectase qu'hai dalgún tipu d'irregularidá una mala acción de funcionarios y ex-funcionarios municipales”, conseñó.

Rivas confirmó que la so posición política “sigue siendo la mesma” y que, de la documentación que pudieron conocer col llevantamientu parcial del sumariu indícase qu'hai “posibles nicios de que dalgunos de los contratos puen actuase primeramente pa dirixilos y pue causar un perxuiciu patrimonial al conceyu”.

Moriyón pide un rastrexu "fondu" pa constatar si hai contratos col casu

L'alcaldesa de Xixón, Carmen Moriyón, pidió un rastrexu "fondu" nel consistoriu que determine si'l Conceyu axudicó contratos a empreses rellacionaes col casu Enredadera.

En declaraciones a los periodistes, tres la celebración de la ufrienda a Xovellanos, la rexidora reclamó a dellos servicios del consistoriu informes pa constatar si hebo dalguna axudicación y "si eso" conocer en qué circunstancies y quién compunxeron les meses de contratación.

"Nun tuvi nengún contactu políticu coles persones qu'apaecen nos medios de comunicación" apuntó enantes de sostener que, anguaño, nun-y consta nengún requerimientu por parte del xulgáu.

Moriyón dixo que se van atender, "según el reglamentu", los pidimientos d'información de la oposición sobre esti asuntu, anque recordó que "los conceyales tien una accesu a tolos espedientes de contratación nel momentu que lo crean afayadizo".