Vecinos de La Camocha alvierten de que nun consentirán nin un desahuciu

Los afectaos lleven les sos protestes a les cais d’Uviéu

Los vecinos del pobláu mineru de La Camocha (Xixón) alvirtieron güei de que nun consentirán nin un desahuciu ente los 37 residentes que tán amenazaos por esta midida pola alministración concursal propietaria de les viviendes onde residen dende va décades.

Esti colectivu treslladó güei les sos protestes a Uviéu pa llevar alantre una manifestación ente la plaza de La Escandalera y la sede de l’alministración concursal a la que s’amestaron colectivos de pensionistes y dirixentes de Podemos.

Delles decenes de persones participaron na movilización portando pancartes y carteles col lema "Non a los desahucios en La Camocha", una amenaza que pesa sobre un colectivu de persones que los más d’ellos tienen más d’ochenta años y vivieron ellí tola so vida, según el presidente de la Federación d’Asociaciones de Vecinos de Xixón (FAV), Adrián Arias.

"Ye un acosu y esbarrumbe escontra unes persones por parte d’una alministración concursal que considera les viviendes bienes d’empresa", señaló Arias, que recordó amás que diez d’elles tienen yá orde de desaloxu darréu.

Arias avanzó que nengún de los afectaos abandonará los inmuebles, d’una media de 45 metros cuadraos, y que si quieren desahucialos "tendrán que venir a sacalos d’un pobláu mineru onde tanto se sufrió y se lluchó".

"Munchos d’ellos nacieron ellí y ellí criaron a los sos fíos", apuntó’l presidente de la FAV, que recordó qu’en munchos casos les sos pensiones nun superen los 600 euros y que l’alministración concursal plantega que merquen les viviendes por precios que van ente los 85.000 y los 90.0000 euros.

Amás, recordó qu’esisten precedentes de situaciones asemeyaes como la de Ciñera (Lleón) onde les viviendes fueron mercaes pola Xunta de Castiella-Lleón y vendíes a precios baxos a los sos inquilinos o arrendaes con un alquiler social a los que nun podíen facer frente a la compra.

Na movilización participó tamién el secretariu de Sociedá Civil de Podemos, Rafa Mayoral, que calificó de "inconcebible" la situación d’inseguridá na que viven los vecinos amenazaos por un desaloxu forzosu ensin alternativa habitacional.