Veinticinco tonelaes de ropa y material sanitario camín d'Ucraína

Un equipu de TPA Noticies acompaña al convói humanitariu

Un camión con ayuda humanitaria salió dende Asturies rumbo a la llende d’Ucraína con Polonia. A bordu van cerca de 25 tonelaes de ropa, comida y material sanitario.

Esti unviu ye productu de la solidaridá de particulares y empreses asturianes que se movilizaron nos últimos díes pa recoyer, organizar y unviar.

El tráiler salió, a la fin, a primer hora d’esta mañana y, con ellos, viaxa un equipu de TPA Noticies.

Otru convói con ayuda dende l’Oriente

L’Asociación Turística EcoPicos d’Europa entamó, en namás 24 hores, una recoyida esprés de comida, ropa y material sanitario pa llevar a Ucraína.

La collaboración de los cangueses foi tan grande que nun entró tol material na furgoneta. Tuvieron que seleccionar lo más básico.

Dos conductores dirán turnándose nos tres díes que durará’l viaxe hasta Varsovia. Son cuasi 3.000 kilómetros. Ellí, otra entidá humanitaria encargaráse d’entrar cola comida, ropa y medicines n’Ucraína.

Pero la furgoneta nun volverá vacia. Seis ucraínos volverán nesti vehículu, gracies al contactu que tienen con una compatriota que conoz l’Asociación. Ella mesma informó que la so familia ta intentando cruzar la llende.

Pero ye namás un exemplu de miles de families que tán buscando refuxu fuera de la guerra.​