Venti años del mayor atentáu de la historia d'España

La 'trama asturiana', clave pa consumar los ataques del 11M en Madrid

Mañana cúmplense 20 años del mayor atentáu de la historia d’España. Yera 11 de marzu de 2004. Pasaes les 07:30, en plena hora punta, 10 españíos cuasi al empar en cuatro trenes de Cercaníes de Madrid. Na llinia que xune Alcalá de Henares y Atocha.

Too pasó en cuatro minutos. Un tren españó entrando na céntrica estación, otru taba a 800 metros. El restu de les bombes españaron n’estaciones de Vallecas: nel Pozo del Tío Raimundo y en Santa Eugenia. Zones obreres.

Morrieron 192 persones y alredor d’otres 2.000 resultaron mancaes, 250 graves.

L’atentáu foi tres díes enantes de les elecciones xenerales de 2004.

La 'trama asturiana', clave pa consumar los ataques del 11M en Madrid

Clave pa consumar los atentaos en Madrid foi la llamada 'trama asturiana'. Les persones que facilitaron a los yihadistes 200 kilos de dinamita robada en Mina Conchita, en Miranda. Cinco de los 10 acusaos fueron condenaos a prisión en 2007.

El cabezaleru foi l’ex-mineru Emilo Suárez Trashorras. Según la sentencia, facilitó’l robu de la dinamita sabiendo que diba ser utilizada pa cometer atentaos. Tamién entamó les entregues a Jamal Ahmidan, 'El Chino', que s’inmoló’l 4 d’abril nel pisu que la célula yihadista tenía en Leganés.

Trashorras foi condenáu a más de 34.000 años. Si sal de la cárcel en 2044, cumpliría 40.

El so cuñáu, Antonio Toro, foi condenáu a cuatro años pol Tribunal Supremu. Yá tenía otra condena por tráficu de droga. Salió de prisión en 2022.

Gabriel Montoya, 'El Gitanillo', reconoció facer de corréu de la dinamita y aceptó una pena de seis años d’internamientu al ser menor d’edá.

Tamién Sergio Álvarez y Antonio Iván Reis, condenaos a tres años caún, viaxaron a Madrid n’autobús con esplosivos. Ún fízolo por 600 euros y l’otru pa saldar una delda. Declararon que desconocíen lo que llevaben les sos mochiles.

Los otros cinco acusaos fueron absueltos. Ente ellos Carmen Toro, la hermana d’Antonio y entós muyer de Trashorras.