Vesuvius lleva la so llucha a Uviéu

Industria nun comparte la lóxica de les multinacionales centrada nel beneficiu económicu

Nun alboreciere cuando frente a la fábrica de Vesuvius en Riañu, Llangréu, los trabayadores organizábense pa entamar una caminata pa Uviéu.

La marcha movilizó non solo a los trabayadores de Vesuvius sinón a les sos families, sindicatos y vecinos de Llangréu.

Pa sofitar la protesta col lema "#VesuviusNoSeCierra y #VesuviusSomosTodos", CCOO movilizó la estructura del sindicatu y fletó autobuses dende les comarques de Xixón, Avilés, Nalón y Caudal.

A esta hora tán yá toos n’Uviéu frente a la Xunta Xeneral del Principáu, onde s’amestaron munches más persones que ficieron el camín n’autobús.

Industria nun comparte la lóxica de les multinacionales centrada nel beneficiu económicu

El conseyeru d’Industria, Trabayu y Promoción Económica, Enrique Fernández, defendió picar a la puerta de les oficines centrales de la empresa Vesuvius pa tresmitir la "indignación" pol pieslle de la planta de Llangréu y plantear soluciones que dexen voltiar la situación.

El conseyeru fizo estes declaraciones en comparecencia parllamentaria momentos enantes de la llegada de los trabayadores de la empresa Vesuvius a la Xunta Xeneral p’abordar colos diputaos el pieslle de la planta llangreana.

Fernández refugó’l "sinsentíu" de les decisiones empresariales qu’atienden únicamente al criteriu de los beneficios ensin importar otres consideraciones de tipu social y llamentó’l "drama" que supón el pieslle de la planta pa les families de los sos trabayadores.