Vesuvius plantea dexar un centru loxísticu en Llangréu con menos de 20 trabayadores

Los vecinos, asociaciones y hosteleros zarren fileres na defensa de los puestos de trabayu

Toos con Vesuvius en Llangréu. Naide quier que se pierda un puestu de trabayu más nes Cuenques Mineres y nel Valle del Nalón.

Comerciantes, hosteleros y vecinos xúnense a los trabayadores de la factoría asitiada nel Polígonu de Riañu.

Vesuvius dio a conocer dalgunos de los sos planes de restructuración a l’alcaldesa de Llangréu, Carmen Arbesú, nun alcuentru celebráu ayeri a última hora de la tarde col representante en Francia, Francisco Lorenzo.

Esti treslladó-y a la corporación municipal la intención de la multinacional que nun ye otra que la de llevar la producción de la planta de Riañu.

Aleguen motivos de sobrecapacidá de producción d’hasta un 40%.

Vesuvius treslladó a l’alcaldesa que tán abiertos a vender la nave a otra empresa interesada que desendolcará otra actividá distinta a la llevada alantre hasta agora. L’Ayuntamientu de Llangréu insiste y pide la retirada del ERE.

El Principáu apoya la decisión de los trabayadores de siguir la so actividá industrial

Dempués de la xunta esta mañana con Vesuvius el conseyeru d’Industria, Enrique Fernández, dixo que la empresa nun se mueve del so planteamientu d’acabar cola producción en Riañu, y que’l Principáu ta alliniáu colos trabayadores en defender la continuación de l’actividá industrial como única alternativa.