Villa denuncia quedar ensin fondos pa subsitir tres l'anulación de les tarxetes

Asegura que nun-y notificaron l'autu de midíes cautelares

La defensa de José Ángel Fernández Villa denuncia que l'anulación de les sos tarxetes de débitu dexen a él y a la so familia ensin fondos pa subsistir.

Nun escritu presentáu nel xulgáu asegura que nun pue remanar nenguna de les sos cuentes bancaries.

Esto, aseguren, tórga-yos disponer de fondos pa encarar les sos necesidaes como comida, farmacia o taxis, especifiquen.

Nesi mesmu escritu, cuestionaben que nun se-yos notificara l'autu de midíes cautelares sobro l'embargu del patrimoniu pa poder iguar posibles erros.

Un escritu al que la maxistrada yá contestó vía autu xudicial. Nel so testu, la xueza Begoña Fernández, asegura que'l resolvimientu foi notificáu esi mesmu día 5 de xunu a toles partes y señala, amás, que consta que la procuradora de Villa aceptó esi autu.

La maxistrada dio de plazu hasta güei a la defensa de Villa pa qu'especifique les cuentes coles que supuestamente tien problemes.

Un plazu de namás un día que, en fontes xurídiques, interprétase como la firme intención de la xueza de nun dexar dilaciones indebíes.

Representación procesal

Evitar retrasos na instrucción ye tamién lo que reclama la defensa del constructor Juan Antonio Fernández.

L'abogáu Miguel Valdés-Hevia pide qu'haya un mesmu lletráu pa toles acusaciones populares que quieran presentase nesta causa.

Asina se ve nel escritu que presentó nel xulgáu. Énte la medrana de que seyan numberoses les asociaciones y partíos políticos que quieran allegar, pide esta midida pa evitar dilaciones indebíes asemeyaes, apunta nel so escritu, a les que se rexistraron nel Casu Renedo.

Sorraya, amás, que'l Montepío ye responsable civil subsidiariu y que nun pue personase como acusación popular.