Villa niega usar fondos del SOMA pa fines distintos al cargu pal que foi escoyíu

Afirma que’l procedimientu foi’l mesmu 60 años y punxo en dulda les cuentes

"Nunca garré dineru del sindicatu" y "enxamás" se cuestionaron internamente les cuentes del sindicatu mineru SOMA-UXT que s’aprobaben "por unanimidá", afirmó güei l’ex-secretariu xeneral del sindicatu mineru, José Ángel Fernández Villa, qu’amestó qu’él tomó la iniciativa de conocer l’estáu de les cuentes al traviés d’una auditoría.

Fernández Villa espresóse asina na so declaración énte la Sección Tercera de l’Audiencia Provincial d’Uviéu, onde güei se celebra la segunda xornada del xuiciu escontra él por un presuntu delitu siguíu d’apropiación indebida.

El sindicatu mineru, del que foi secretariu xeneral 35 años, impúta-y el desvíu de 434.158 euros de los fondos del sindicatu al so patrimoniu personal poro, afronta un pidimientu fiscal de cinco años de cárcel, que’l SOMA eleva a seis años de prisión.

Villa aseguró que l’estáu de cuentes "ta ehí" y insistió en que toles decisiones que s’adoptaben nel sindicatu yeren "por unanimidá, incluyida la elección del secretariu xeneral".

El tribunal alcordó que Villa declarara al considerar que nun había razones suficientes pa la so suspensión porque la enfermedá mental sobrevenida y el deterioru cognitivu que sufre, al qu’apelaba l’abogada defensora, Ana García Boto, nun lu incapacitaben.

Pa los maxistraos, "la capacidá de Villa ta alterada, pero non anulada" anque la so lucidez foi variando en más d’una hora de declaración con namái un recesu de 15 minutos.

De les sos primeres palabres, onde reiteraba que "nun recordaba nada" o "toi perdíu" pasó a afilvanar frases completes o a alcordase de que l’alministración "ye tan complexa" que nun podía dar creitu a lo que ta viviendo al intentar rememorar la so etapa nel sindicatu.

Fernández Villa esplicó que sesenta años "son munchos años de responsabilidá na organización" y qu’agora vese "chiscáu" al responder a una entruga de la defensa sobre si recordaba los nomes de les persones que teníen qu’autorizar la representación del SOMA.

Siempres centró nel ex-contable del sindicatu, Juan Cigales, tola responsabilidá de les cuentes del sindicatu y les personales -"llevábalo too", amestó- de forma que yera él el que daba’l dineru cuando los miembros de la dirección del sindicatu entregaben los tiques de gastos.

"Pagaba’l dineru n’efectivo, previa factura. Cigales xestionaba a nivel individual y al enfotu que yo depositare nél", ratificó dempués de señalar que la so axenda de caldía llevábala la comisión executiva del sindicatu y criticar a los sos responsables por nun ser quien a devolve-y "nin los recuerdos, nin los oxetos personales".

"Tampoco quieren poneme en valir, hai que quitar toa imaxe que faiga referencia a la mio persona", señaló dempués de defender qu’había gastos que se facíen de forma individual y asegurar que nunca nun tuvo una tarxeta específica pa usala él sinón que yera "una tarxeta que tenía una dispersión pola xente que la tenía".

En referencia a los gastos en puros, flores o colonia, esplicó que lo facía "por corresponder a otros" y enmarcólo nuna cultura sindical que "conlleva tener esi comportamientu y eses actitúes" mientres que sobre la merca de llibros pal desendolque de la so actividá sindical solliñó: "hai que lleer".

Sobre’l vehículu Mitsubishi, apuntó que la compra decidióse "por motivos de salú" pa facilita-y poder usar un coche qu’axuntare condiciones y que supliere al Audi A4 que tenía enantes y que nun recordaba a nome de quien taba.

"Púnxose’l Mitsubishi al mio nome por comodidá porque toi con un tratamientu singular y facíase un descuentu pola incapacidá y, al tener una minusvalía, l’IVA nun lu tenía que pagar. Esi yera’l motivu pero non la totalidá. Había más motivos", que nun especificó.

L’ex-líder mineru, que namái contestó a entrugues de la so abogada defensora, Ana García Boto, sí amosó alcordase de que nun fuere espulsáu del sindicatu.

"Yo dimití por motivos de salú", aclaró enantes d’identificar al ex-contable de la fundación Infide, Amalio Fernández, como la persona encargada de los gastos de la fiesta minera de Rodiezmo, mientres que los gastos de formación llevábalos la secretaría correspondiente.

Fernández Villa nun pudo asegurar dafechu si los documentos qu'amosaben llevaben impresa la so robla por mor de que, aseguró, nun yera capaz de vela nin de distinguir la so lletra.

Dempúes de Villa declaró l’otru acusáu Pedro Castillejo qu’aseguró que Villa, na so condición de secretatriu xeneral del SOMA, influyía nel nomamientu de cargos como’l qu’él tuvo nel Infide pero qu'eso nun implicaba tener una rellación especial con Villa.

Amás señaló que yera Juan Cigales l’únicu que tenía accesu a la xestión contable d’Infide.