Xixón esixe fiances d'hasta 1.500 euros pa la celebración de fiestes en suelu públicu

Discutiniu y enfadu ente los organizadores y entidaes ensin ánimu d'arriquecimientu de les fiestes parroquiales

Enfadu y confusión ente les asociaciones vecinales y otres entidaes organizadores ensin ánimu d'arriquecimientu de les fiestes qu'usen suelu municipal porque'l Conceyu de Xixón reclama una fianza pal so desenvolvimientu nes parroquies, como por casu en Roces, Fano o Castiello.

Según el Conceyu de Xixón, el grau de vandalismu medró nestos últimos años na celebración de les fiestes sobro suelu municipal. Por esta razón, el consistoriu busca prevenir daños estructurales y protexer el patrimoniu públicu.

Los precios de la fianza danse en función de la singularidá de cada terrén. Esta iniciativa ye según los organizadores escesiva pa les zones rurales onde los recursos son más llendaos, espliquen José Manuel Rodríguez, presidente de vecinos de Fano y Aitor Álvarez, presidente de la comisión de fiestes de Deva.

Lo que quier el Conceyu de Xixón ye xenerar un estudiu d'equí p'alantre sobro l'estáu inicial nel que se concedió esi terrén pa la so celebración, siguíu d'un informe nel que s'afita cómo se recibió'l suelu una vegada remataes les fiestes.