Xixón súmase a los baldeos de les cais

La zona centru asturiana estrenará 2020 con riesgu estremu por contaminación, si sigue l’anticiclón

Xixón entamó a baldiar dalgunes cais de la zona oeste de la ciudá. L’ayuntamientu entamó esta actuación de manera preventiva énte los índices de contaminación atmosférica rexistraos la última selmana na estación d’El Llauredal, de titularidá municipal. 

El Principáu nun tien en cuenta estos datos, al nun pertenecer la estación medidora a la so rede, poro, nun activaron el protocolu anticontaminación en Xixón. 

El Principáu activa’l protocolu de contaminación en fase de prevención en Llangréu y xube’l nivel en Llugones y zona norte d’Uviéu, onde se rebaxa yá la velocidá y prohíbese la circulación de los vehículos pesaos a delles hores del día. 

A pesar del sol, esta mañana les cais de Ventanielles, n’Uviéu, taben moyaes por mor de los baldeos d’agua, dempués d’activar el Principáu el protocolu anticontaminación. 

La estación del Palaciu de los Deportes d’Uviéu foi la segunda que rexistró esta mañana una mayor contaminación. Si sigue l’anticiclón, la zona centru asturiana estrenará’l 2020 con riesgu estremu por contaminación.

Los conceyos de Llanera, Noreña, Uviéu, La Ribera y Siero son los cinco que presenten mayor riesgu nel Principáu.