Xixón va recurrir la sentencia qu'obliga a restituyir el tráficu n'El Muro

Olmo Ron: "Siguimos col oxetivu final de tar a finales d'añu entamando les obres de reforma d'El Muro"  

El Conceyu de Xixón va recurrir la sentencia del Xulgáu de lo Contencioso Alministrativo númberu 1 qu'envaloró'l recursu interpuestu pola asociación ciudadana “Stop Muro” escontra la peatonalización parcial del paséu d'El Muro de San Llorienzo llevada alantre na pandemia de coronavirus y que reclama al equipu de gobiernu restituyir el tráficu na carril qu'agora igua'l conocíu como “cascayu”.

El tribunal anula'l resolvimientu d'Alcaldía de 22 de xunetu de 2020 pola que se declaró'l calter d'emerxencia de les obres de peatonalización parcial d'El Muro pa ganar espacios peatonales col envís de guardar la distancia de seguridá al considerar que nun ye conforme a derechu y reclama la restitución del tráficu “de forma permanente sobre la carril anguaño destinada al tránsitu peatonal”.

El conceyal d'Obres, Olmo Ron, afirmó que'l Consistoriu respeta “dafechu” el conteníu de la sentencia pero va recurrila porque hai aspeutos del fallu que nun comparte, anque nun quixo concretalos.