Yolanda Díaz apuesta por reformar la SEPI pa tener presencia nes empreses rescataes

La ministra califica d'inasumible qu'eléctriques como Iberdrola y Naturgy esmantelen les sos centrales térmiques

Anque conocedora de la crisis en Duro Felguera, Yolanda Díaz llamenta nun tener competencies pa mediar nel conflictu al inxertase l'ERE solo nuna comunidá autónoma. La ministra de Trabayu apuesta por una reforma en fondura de la SEPI pa qu'empreses como Duro rescataes con dineru público nun puean depués plantegar despidos. Les alministraciones públiques, defenden, han d'entrar nes empreses que rescaten.

D'inasumible califica Díaz qu'eléctriques como Iberdrola y Naturgy esmantelen les sos centrales térmiques n'Asturies ensin xenerar empléu alternativu. Daqué que non solo xenera probitú sinón qu'aumenta'l riesgu de la puxanza de la estrema derecha que bebe de la desafección ciudadana.

N'amosando la so esmolición pola baxada de la ocupación llaboral nel Principáu, la ministra animó a los trabayadores a que denuncien cuando'l so contratu seya irregular. Ye lo que ta socediendo colos fixos discontinuos.

Asturies ye la segunda comunidá autónoma onde más fraude se detectó, hasta un 63% de los contratos fixos discontinuos inspeccionaos por trabayu, yeren irregulares al ser, en realidá, de fixos ordinarios.