L'auditoriu Príncipe Felipe d'Uviéu va reabrir n'ochobre

L'edificiu va tar operativu pa los Premios Princesa

L'auditoriu Príncipe Felipe d'Uviéu va poder tornar cola so actividá avezada'l próximu mes d'ochobre. Asina lo garantiza la empresa encargada del proyectu de reforma p'adaptar l'edificiu a la normativa escontra quemes. Los trabayos van a bon ritmu y prevése que puean acurtiase los plazos.

Un equipu de TPA tuvo nel edificiu pa conocer cómo avancen los trabayos. Sobro la fachada oeste del Auditoriu yá ye visible la nueva salida d'emerxencia. Pa la so apertura, la roca orixinal del edificiu cortóse con filo de diamante. Tres cuasi dos meses, les obres avancen col allugamientu de los conductos d'estracción de fumu: 2.200 metros cuadraos en total.

El nuevu sistema escontra quemes va obligar a que se quite'l lucernariu del Auditoriu. Van instalase otros ocho estractores de fumu más: cuatro na sala principal, dos na de Cámara y dos na sala Polivalente.

Nel suétanu, yá se valtó l'antiguu barcal onde se captaba l'agua pa los rociadores. Va sustituyise por tres depósitos con capacidá pa 210 metros cúbicos.

L'edificiu, garanticen dende la dirección d'obra, va poder tar perfectamente operativu pa los próximos Premios Princesa. Anque la reforma entá va siguir, ensin influyir na programación avezada, polo menos, hasta marzu del próximu añu.