Los ganaderos defenden qu'un mataderu móvil amenorgaría costos de desplazamientu

Los gastos de tresporte puen algamar el 40% de preciu de venta de la res

La Unión de Campesinos Asturianos (UCA) solicitó esti martes al Principáu la puesta en marcha d’un mataderu móvil n’Asturies qu’evite a los ganaderos el tresporte de les reses al llugar onde son sacrificaes, amenorgando y racionalizando costos que, en dalgunos casos, puen algamar el 40% de preciu de venta de la res.

El secretariu xeneral d’UCA, Juan Ramón García Alba, treslladó esti pidimientu, tamién formuláu per escrito, al conseyeru de Mediu Rural y Política Agraria, Marcelino Marcos, na xunta na que participaron amás la presidenta de Muyeres Campesines Asturianes, Florentina Tuñón, xunto a otros representantes del sector.

La organización sindical apunta que, anguaño, los productores del Principáu tienen qu’ocupase de llevar los sos animales a dalgunos de los mataderos d’Asturies, toos ellos asitiaos na zona centru o, en menor midida, nel centru-occidente.

P’animales grandes, abonda que’l costu del tresporte -dir y volver- pue ser más o menos asumible, teniendo en cuenta’l mayor volume y preciu del animal, mientres que pal ganáu pequeñu, como l’ovín y el caprín, l’impactu de los costos de tresporte nel preciu final ye "mui significativu", al rodiu de 25 euros por res, que puen suponer el 40 por cientu del so preciu de salida.