Desconvocada la fuelga de docentes: El cursu entamará'l 10 de setiembre con normalidá

Educación estudiará la mengua de xornada pa docentes de más de 55 años y negociar la mengua de la xornada llectiva de los maestros de 25 a 23 hores selmanales

La Conseyería d’Educación y los sindicatos CCOO, UXT, Suatea y CSIF llegaron esti miércoles a un alcuerdu pa desconvocar la fuelga que programaren pal 10 de setiembreviniente, coincidiendo col entamu del cursu escolar.

Dempués de que’l llunes pasáu’l director xeneral de Personal Docente, César González, y el comité de fuelga retomaren los contactos, esti miércoles volvieron les negociaciones que remataron dempués de más de cuatro hores de xunta y dellos retrasos na robla del alcuerdu al averar postures en cuantes a la mengua de la xornada llectiva del cuerpu de maestros y de la xornada a los profesores de más de 55 años.

Estos cuatro sindicatos docentes -ANPE nun s’amestare- plantegaren esta fuelga pa reclamar más inversión en materia educativa, una actualización del alcuerdu de plantiyes, vixente dende 2002, y meyores salariales pa los docentes asturianos, al considerar que son los "peores pagaos del Estáu".