El Principáu nun tien constancia de casos de la EHE na cabaña asturiana

L'Ayuntamientu de Llanes aprobó una partida de 50.000 euros pa sofitar a los ganaderos del conceyu afectaos pola fiebre hemorráxica

El conseyeru de Mediu Rural y Política Agraria del Principáu, Marcelino Marcos, declaró esti miércoles n’Avilés que nun consta la existencia de nengún casu n’Asturies de la Enfermedá Hemorráxica Epizoótica (EHE), un virus tresmitíu per un mosquitu que provoca una alta mortandá ente los rumiantes.

Sí reconoció’l conseyeru que s’unvió dalguna muestra al llaboratoriu, que ta pendiente de los resultaos, “pero, a día de güei”, recalcó, nun consta nengún casu, y pidió la collaboración de los afectaos pa que se lleven alantre los protocolos.

El conseyeru fizo estes declaraciones nel actu de clausura y entrega de premios del CXL Concursu de Ganaos de San Agustín, al que foi xunto a la directora xeneral de Ganadería y Sanidá Agraria, Rocío Huerta, y l’alcaldesa de la ciudá, Mariví Monteserín.