La dirección xeneral de Mines intervendrá nel Pozu San Xerónimu de Teberga

Va llimpiase y intentar acabar colos argayos que torguen la entrada a una de les galeríes más antigües

El Pozu San Xerónimu foi esplotáu dende entamos del sieglu XX pola compañía Mines de Teberga, la sociedá Carbones de Teberga y finalmente por Hullasa. Una de les sos galeríes, la tresversal de La Cruz, ta bloquiada a cien metros de la entrada pol argayu de tierra. L’actuación de la dirección xeneral de Mines tendrá como oxetivu meyorar la seguridá d’esti tramu apunta Alberto Vázquez, xefe de la sección de Seguridá de la dirección xeneral de Mines.

La mina amás tien toles sos plantes inundaes y desagua a El Ríu de Taxa per una galería señala Adrián Gayo, acalde de Teberga. Pa Teberga, esti ye un primer pasu pa restaurar el restu de la galería y, a futuru, facer visitable la mina.

L’actuación tendrá un costu de 54.000 euros con cargu al presupuestu de 2024 de la dirección xeneral de Mines. Los trabayos entamarán enantes de qu’acabe l’añu con un plazu de fechura de dos meses.