Entama'l cursu escolar en nueve comunidaes

Afluencia nos centros comerciales pa les compres de material escolar

La imaxe de la vuelta a escuela repitióse güei en nueve comunidaes autónomes. Emoción, nervios y ganes de ver a los collacios y d’estrenar material. En total ente güei y el miércoles, volverán a les aules n’España ocho millones d’alumnos y alumnes.

El nuevu cursu traerá la prohibición y llende de móviles nes aules, que yá aplicaben dalgunes comunidaes; el plan de refuerzu de Matemátiques y Llingua castellana; y los cambeos pa la nueva EBAU.

Y los asturianos fadránlo mañana. Entamarán un cursu nel qu’habrá menos alumnos y alumnes y menos aules.

Güei, a pesar de ser festivu, abren los centros comerciales d’Asturies. Ye la oportunidá de facer les últimes compres de llibros, material escolar, ropa y tolo necesario pal entamu del cursu de mañana. Aprovéchenlo sobre manera les families con fíos que busquen güei nos comercios les últimes compres de material escolar o de ropa. Dende primer hora ta notándose l’afluencia nos centros comerciales.

Los centros y parques comerciales xeneren 20.729 puestos de trabayu n’Asturies, según los datos apurríos pola Asociación Española de Centros Comerciales.

Los 15 centros d’Asturies axunten 803 locales. Si en población Asturies ye la decimocuarta comunidá autónoma del país, por densidá de centros comerciales ta en quinta posición.