Los vecinos de La Castañera tienen mieu que s'inunden les sos cases

Los propietarios esixen esplicaciones pola construcción d'una lladera frente a les sos viviendes

Malapenes cuerre agua pel calce de la riega La Castañera, en Les Arriondes. Nel so tramu final acaba de llevantase una lladera de tierra dientro de les obres pa protexer a la capital parraguesa de les medríes d’El Ríu Piloña y d’El Ríu Seya.

Esos trabayos provocaron esmolición ente los propietarios de tres viviendes cercanes a la riega que tienen mieu de sufrir nueves inundaciones.

Los afectaos, que se dirixeron al Ayuntamientu de Parres reclamen esplicaciones de los responsables de la obra.

El calce de la riega, a la que yá cayó tierra de la nueva lladera, aseguren, lleva años ensin llimpiar.

Les obres pa protexer Les Arriondes de les riaes cunten con un presupuestu de 17 millones d’euros y quieren rematales l’añu viniente.