Gimena Llamedo afirma qu'Asturies nun sufre masificación turística

Llamedo ve innecesaria la tasa turística autonómica y cree "positivo" estudiar la local

La vicepresidenta del Principáu, Gimena Llamedo, dixo esti xueves na Xunta Xeneral que, como’l presidente del Gobiernu asturianu, Adrián Barbón, y la viceconseyera Lara Martínez, nun ve necesario afitar una tasa turística autonómica, anque, atendiendo a la "autonomía" municipal, considera "positivo" analizar l’afitamientu d’un canon local de calter voluntariu.

Na so intervención na comisión de Presidencia, Retu Demográficu, Igualdá y Turismu pa responder a tres entrugues sobre turismu de PP, Vox y el Grupu Mistu, afirmó qu’Asturies nun ye un destín masificáu, anque "en momentos puntuales y llugares específicos hai una afluencia importante de persones, con fluxos que nun son homoxéneos".

Sobre’l modelu turísticu del Principáu, señaló que "se definió va más de 40 años, y que se fizo con munchu aciertu", con una apuesta pola sostenibilidá, la responsabilidá y el respetu col mediu ambiente y la cultura, acordies a la declaración de principios recoyida nel eslogan 'Asturies, Paraísu Natural'.