La Foceicha ye'l pueblu más altu de Teberga

La vida na zona ye sinónimu más de paz que d'aburrición

Hai pueblos con vida, anque nun s'habiten los 365 díes del añu y La Foceicha, en Teberga, ye unu d'ellos. Nes sos cases, les más altes del conceyu, los tendales tienen ropa y les madreñes caltiénense esperando a la puerta.

Rufino Busto, natural de La Foceicha, sabe que los que nacieron equí saben que son privilexaos y tornen. A recordar qu'ente caleichas hai requexos que pertenecen a los texos, a axuntase colos vecinos de siempre o los de camín pa ver pel iviernu la so llaguna glaciar.

Esta tierra de pataques, lenteyes y escanda tira, y tira enforma.

Un llugar onde yá nun usen barachones pa la nieve nin zurrones pa baxar la lleche del puertu, pero que siguen guardando les meyores vistes de Ventana o Las Navariegas. Onde quiciabes la vida ye sinónimu más de paz, que d'aburrición.