Salú quita importancia a qu'Asturies nun cunta con una unidá de protonterapia

El Principáu tien la tecnoloxía más avanzada n'oncoloxía radioterápica
Tanto la conseyera como’l responsable del serviciu d’oncoloxía radioterápica del HUCA quiten importancia a qu’Asturies nun vaya tener unidá de protonterapia, a diferencia de Galicia y Cantabria. Los seis aceleradores lliniales que tien la sanidá pública asturiana atienden a unos 3.000 pacientes al añu, y, destaquen, cubren les necesidaes del sistema.
La Conseyería de Salú trabaya yá na planificación p’anovar nos cuatro o cinco años vinientes l’equipamientu tecnolóxicu. Sicasí la oncoloxía radioterápica pasa per un momentu importante. Avances qu’estos díes analicen más de 800 profesionales de la sanidá nun congresu n’Uviéu.
La radioterapia adaptativa, que dexa adaptar de manera mui personal a cada paciente la dosis de radiación y la radiociruxía, son dalgunos d’esos avances que dexen atacar con mayor eficacia los tumores.