Siero conviértese nel primer conceyu qu'aprueba los sos presupuestos pa 2025

Les cuentes del consistoriu superen los 60 millones pa 2025, un 3% más que'l d'anguaño  

El plenu del Conceyu de Siero aprobó esti xueves de forma inicial un presupuestu municipal consolidáu pal añu que vien de 60,4 millones d'euros, un 3% superior al del presente exerciciu.

El documentu salió alantre con catorce votos a favor del PSOE, la Plataforma Vecinal de La Fresneda y Izquierda Xunida, ocho a la escontra del Partido Popular y Podemos, y dos abstenciones de Vox.

Les cuentes del consistoriu, qu'algamen los 58,04 millones d'euros, crecen un 2,66% al respective d’anguaño, colo qu'aumentaron la so cuantía un 38 por cientu na última década, destacó'l consistoriu nun comunicáu.

Pela so parte, la Fundación Municipal de Cultura va cuntar con un presupuestu de 2,86 millones d'euros, un 4,1% más qu'anguaño.

Finalmente, les cuentes del Patronatu Deportivu Municipal van xubir a 5,4 millones, un 5% más qu'en 2024.

L'apartáu relativu a inversiones algama los 9,7 millones d'euros pa llevar alantre 60 actuaciones nes que, por importe, destaquen les once obres en materia de saniamientu en tol conceyu por 3,2 millones, ente elles nel barriu de La Isla de La Pola, pa evitar inundaciones n'episodios de lluvies intenses.

Tamién s'atopen ente les principales inversiones afitaes les de los accesos a la capital del conceyu pela autovía minera, que cunten anguaño con una partida pa entamar los trabayos de 1.161.095 euros.