Llangréu pon un contencioso alministrativu pol depósitu de povisa de Lada

L'Ayuntamientu asegura que nun hai llicencia independiente pal depósitu

L’Ayuntamientu de Llangréu punxo un recursu contencioso alministrativu en rellación al depósitu de povisa na escombrera de Lada dempués de desestimar la Conseyería de Transición Ecolóxica, Industria y Desendolcu Económicu del Principáu d’Asturies les alegaciones presentaes pol consistoriu.

L’equipu de Gobiernu local, perteneciente a Convocatoria por Llangréu, señala nuna nota que l’autorización ambiental foi dada, daquella, pa l’actividá de la central térmica d’Iberdrola con un permisu "venceyáu a l’actividá" d’esta instalación, agora en "procesu d’esmantelamientu".

Amás, l’Ayuntamientu de Llangréu solliña que "nun hai" nos archivos municipales llicencia d’actividá nin tramitación independiente pa la instalación del depósitu de povisa.