Más de 600 ñácaros usaron el bancu de lleche materno del HUCA dende 2017

Les matrones reclamen más recursos humanos y materiales pa esparder la llactancia nes ales

Dende la so creación en 2017, más de 600 ñácaros alimentáronse con lleche materno del bancu del HUCA, un centru que recibió nestos siete años 1.900 litros de lleche de más de 300 donantes.

Los especialistes en neonatoloxía afirmen qu’esti alimentu menguó bultablemente la incidencia de dalgunes patoloxíes graves en neonatos.

Enantes de 2017, alimentábase a los ñácaros prematuros con un preparáu especial que cola apertura del bancu de lleche materno quedó prácticamente desterráu en neonatoloxía.

Nun tardaron en ver resultaos. La incidencia de dalgunes enfermedaes graves, como la enterocolitis necrotizante, cayó bultablemebte, esplica Laura Mantecón, neonatóloga del HUCA.

Namás l’añu pasáu 70 neonatos alimentáronse con lleche d’otres madres n’Asturies y d’ellos 25 yeren grandes prematuros, ye dicir, pesaben menos de kilo y mediu o nacieron enantes de la selmana 32.

Hasta la fecha nun tuvieron falta de lleche pero dende’l bancu faen un llamamientu a la donación y dan les gracies a los que yá lo ficieron.

Les matrones reclamen más recursos humanos y materiales pa esparder la llactancia nes ales. Les matrones demanden más formación en llactancia materna y un accesu equitativu de les madres a los recursos sanitarios. Denuncien que nes ales son mayores les torgues p’afitar y caltener la llactancia porque los sofitos son menores.

Nel occidente namás hai una matrona n’atención primaria que tien que rotar per tolos conceyos y l’Hospital de Xarrio perdió la so acreitación como centru amigu de la infancia. La consecuencia: les tases de llactancia baxaron.