Webcams
Buscar
Tres vuelos con destín a Santander, Bilbao y Vigo, esviaos a Asturies pol vientu
Cerca de tres hores tuvo atayáu'l tráficu ferroviariu entre Candás y El Regueral pola cayida d'un árbol, quedando la incidencia arreglada enantes de les 16:00. Tamién tuvo suspendíu'l tráficu de trenes entre Uxo y Morea a primer hora de la mañana una hora.
Dalgunes de les consecuencies d'una borrasca que tamién causó incidencies nel corredor del Nalón, tres la cayida d'otru árbol sobro la carretera, provocando delles caravanes.
La mariña asturiana tamién sufrió les consecuencies de la ivernada. La flota pesquera tuvo amarrada en cai tola xornada por cuenta del folaxe causáu, principalmente, polos fuertes vientos.
Vientos qu'obligaron en Xixón a precintar el parque Isabel La Católica pa evitar daños pola cayida de cañes. Lo mesmo n'Uviéu, col parque San Francisco.
Y ye que'l vientu sopló con fuerza obligando a dellos consistorios a adoptar midíes de protección.
En Ribeseya, el conceyu decidió suspender el mercáu selmanal por procuru énte unes previsiones de vientu poco favoratibles. Equí tamién se miró con esmolición les zones más próximes al mar, cerrando dellos paseos marítimos.
El vientu tamién foi protagonista nes zones más interiores de la rexón, con raches que superaron en Picos d'Europa los 150 kilómetros hora. En Tinéu, por casu, la nueche foi bien llarga.
La situación a lo llargo de la tarde foi ameyorando, tres una mañana na que les temperatures llegaron a cayer más de 10 graos.
Tres vuelos con destín a Santander, Bilbao y Vigo, esviaos a Asturies pol vientu
Esta tarde rexistráronse retrasos nos vuelos con orixe y destín Asturies. Les conexones con Madrid tienen retrasos de media hora. Ye'l casu del últimu vuelu que despegó de Madrid a les 20.15.
Pela mañana, les incidencia fueron menores.
Sicasí tres vuelos con destinos a otros aeropuertos sí tuvieron que ser esviaos a la terminal asturiana. Socedió con un vuelu procedente de Bolonia con destín a Santander, onde les fuertes raches de vientu torgaron aterrizar. Lo mesmo socedió col avión que faía'l trayectu Málaga-Bilbao y el de Barcelona-Vigo.
