IX ruempe'l pactu de Gobiernu col PSOE en Candamu

Les diferencies sobre'l parque eólicu de Bufarán son insalvables, según la formación

IX rompió'l pactu de gobiernu que caltenía col PSOE en Candamu por diferencies “insalvables" sobre’l proyectu pa la instalación del parque eólicu de Bufarán, que plantega l'allugamientu de cinco aeroxeneradores na sierra de Sorella.

El sofitu del únicu edil de la coalición foi imprescindible pa que'l PSOE retuviera'l gobiernu local de Candamu tres les últimes elecciones, nes que los socialistes perdieron la mayoría absoluta y llograron cuatro conceyales, los mesmos que'l PP.

Según informó esti vienres la coalición, IX adoptó la decisión "de forma unillateral, siguiendo'l consensu algamáu poles bases" de la formación.

IX argumenta que la postura del PSOE a favor del proyectu eólicu de Bufarán "choca dafechu" cola visión pos-capitalista de “bienestar social, rexeneración ecolóxica y desenvolvimientu rural" de la coalición.

Tres delles conversaciones pa "averar postures y llegar a un consensu", rescampla que dambes formaciones caltienen "posiciones antagóniques" al respective de la visión de futuru pal conceyu y especialmente al respective d’esti tipu de “proyectos industriales".

A esti respectu, afitó que "el polígonu eólicu de Bufarán supón una llinia colorada" y nun pue "ser cómpliz nin sociu d'un gobiernu que tea a favor d'esta industrialización del mediu rural" ensin respetar les competencies del conceyal d'IX en materia de mediu ambiente y montes, y ensin dar "una respuesta afayadiza al refugu vecinal d'una clara mayoría social que s'opón a esi proyectu".