Fapas denuncia l'envelenamientu d'un grupu d'utres lleonaes n'A Serra de Bovia

L'asociación fala de "abandonu total" del Principáu al respective de la conservación del patrimoniu natural

El Fondu pa la Protección de los Animales Salvaxes (Fapas) denunció esti martes l’envelenamientu y muerte d’un grupu d’utres lleonaes n’A Serra de Bovia, lo que según l’asociación afita’l “abandonu total” del Gobiernu del Principáu al respective de la conservación del patrimoniu natural d’Asturies.

Según informa nun comunicáu, el fin de selmana pasáu foi detectada la presencia de tres utres lleonaes muertes al llau d’una carroña nun prau d’A Serra de Bovia, nos montes de la llende con A Veiga, dempués d’una llamada anónima al Fapas, mientres qu’unu más, viose alloñándonse volando "en fase agónica".

“La imaxe d’utres muertes al llau d’una carroña nos praos del monte, alerta sobre la reapaición del usu del velenu como va décades que nun se facía. L’usu de tóxicos na naturaleza asturiana entama a ser un vezu, reproduciéndose escenes que yeren avezaes nos años 70, cuando hasta la propia Alministración, l’antiguu ICONA, repartía velenu ente los miembros de la guardería p’acabar coles mal llamaes alimañes”, solliña’l colectivu.