Asturies ye la comunidá con mayor incidencia d'ictus d'España

La sección de patoloxía cerebrovascular del HUCA alerta de la medría d'ictus en persones moces

Asturies ye la comunidá con mayor incidencia d’ictus d’España. Hai 300 casos por cada 100.000 habitantes, ye dicir, unos 3.000 al añu. Afecta sobre manera a mayores de 65 años pero, atención, porque cada vegada hai más accidentes cerebrovasculares en persones d’ente 35 y 65 años.

Nos últimos años, la incidencia nesa gran estaya d’edá medró un 25%. Los ictus son la primer causa de mortalidá en muyeres y la segunda n’homes. Amás, ye la segunda causa de demencia tres de la enfermedá d’Alzhéimer.

El pronósticu meyora al empar que los tratamientos pero na sección de patoloxía cerebrovascular del HUCA esmolez la medría d’ictus en persones moces, d’ente 35 y 65 años. Lleva medrando décades, señala Sergio Calle, xefe de patoloxía cerebrovascular del HUCA.

Pa meyorar la prevención y l’abordaxe de la enfermedá’l Ministeriu de Sanidá acaba d’actualizar la estratexa nacional escontra l’ictus, un marcu teóricu qu’agora tienen que desendolcar les autonomíes. Ente otros aspectos insiste na rehabilitación de los pacientes.

Los espertos echen en falta protocolos que garanticen la igualdá nel accesu a los servicios de rehabilitación, ensin importar ónde se viva.