El Principáu entama los trámites pa poner en marcha'l Foru pola Salú Mental

Salú defende afitar un "modelu comunitariu", integral y a llargu plazu

La conseyera de Salú, Concepción Saavedra, dio anuncia esti martes de que la Conseyería robló la resolución pa crear el Foru pola Salú Mental n’Asturies, una entidá qu’agrupará a diferentes asociaciones y actores venceyaos con esti ámbitu pa debatir la futura llei autonómica.

Según esplicó Saavedra en sesión parllamentaria, ayeri tuvo llugar la robla de la resolución pa crear esi foru y la idea ye que, una vegada asoleyada nel BOPA, la Conseyería entame a contactar con diferentes asociaciones pa ponelu en marcha bien llueu y que trabayen nel pactu pola salú mental, asina como nos primeros pasos de la llei anunciada pa 2026 pol Principáu.

En rempuesta a una entruga parllamentaria de la diputada del Grupu Parllamentariu Vox, Sara Álvarez Rouco, la conseyera afirmó que la conseyería de Salú trabaya día a día p’abordar el problema que supón la salú mental y ta reforzando la plantiya de psiquiatres y psicólogos.

Más allá del refuerzu de l’atención y la detección temprana de casos, defendió la necesidá d’afitar un "modelu comunitariu", integral y a llargu plazu p’abordar la salú mental.