Domínguez Begega asume'l xuiciu escontra Álvarez-Cascos qu'entamará'l 7 de xineru

La Fiscalía pide p'Álvarez-Cascos tres años y mediu de cárcel

El xuiciu escontra l’impulsor de Foro Asturies, ex-vicepresidente del Gobiernu y ex-presidente del Principáu, Francisco Álvarez-Cascos, acusáu d’un delitu de siguío d’apropiación indebida por cargar gastos personales al partíu, foi señaláu nuevamente pal 7 de xineru dempués de suspendese tres vegaes.

Según el nuevu señalamientu afitáu nuna providencia, la vista oral celebraráse na Audiencia Provincial d’Uviéu en seis sesiones, los díes 7, 9, 16, 21, 24 y 29 de xineru.

El xuiciu escontra Álvarez-Cascos suspendióse tres vegaes, la primer vegada en mayu del añu pasáu por coincidencia de señalamientos de los abogaos, y dempués en febreru y n’ochobre d’esti añu por motivos de salú d’un maxistráu, qu’amás ye ponente de la causa, y la imposibilidá de sustituyilu.