Valledor, ALSA y Excade, premiu Industria 4.0 pol so apueste tecnolóxicu nos sos sectores

A Ewala, una compañía nueva dedicada a la ciberseguridá d'empreses y industries, diose-y una mención especial

Les empreses asturianes Valledor, ALSA y Excade llograron güei los premios Industria cuatro puntu cero que dan el CTIC y Caxa Rural d'Asturies.

El xuráu reconoció na compañía Valledor la so implantación nun territoriu castigáu pola crisis demográfica, el suroccidente d'Asturies, y el so apueste pola tecnoloxía nos sos trabayos de xestión forestal. La inversión continua n'anovación aplicada a los sos vehículos y a la relación colos viaxeros foi valorada pa premiar a ALSA.

La empresa d'inxeniería civil Excade destaca pola so aportación tecnolóxica nun campu, el de la obra pública, nel que nun ye vezu. Diose una mención especial a Ewala, una compañía nueva dedicada a la ciberseguridá d'empreses y industries.