Los grandes conceyos, Llangréu y la costa oriental ganen población

Asturies gana población

Asturies gana población. Ye un datu que confirmó’l Censu Añal de Población qu’acaba d’asoleyar l’INE. El Principáu suma más de 3.500 habitantes al respective del añu anterior.

Esa medría produzse, sobre manera, gracies a los cuatro conceyos más poblaos. Xixón, que ye’l que más habitantes tien, gana cerca de 1.300. Uviéu ye’l que más más vecinos gana, cerca de los 2.700. Avilés, que venía perdiendo población nos últimos años, esperimenta un pequeña medría y Siero sigue la so medría con 350 vecinos más.

El mayor conceyu de la cuenca del Nalón rompe la so tendencia a perder habitantes y vuelve a ponese penriba de los 38.000 vecinos: 38.265 censaos a ún de xineru de 2024. Son cerca de 300 más qu’un añu enantes.

Na Cuenca del Caudal, sigue cayendo la población en tolos conceyos y Mieres malapenes supera los 36.000 vecinos.

Como nel restu d’España, les zones de costa d’Asturies son, en xeneral, les que medren el so censu. Sobre manera, les más turístiques del oriente asturianu, como Llanes o Ribeseya, tamién Villaviciosa y otres con tirón pa los visitantes como Cangues d’Onís.

Nel suroccidente sigue la cayida d’habitantes. Cangas del Narcea, Tinéu, Allande, Ibias o Degaña, toos pierden población. Anque nun pasa en tol occidente d’Asturies. Llamen l’atención dalgunos pequeños ayuntamientos qu’algamaron revertir la cayida de vecinos, anque seya mínimamente: Grandas de Salime suma 16 y tanto Eilao, como Tameza cunten con un vecín más que l’añu anterior.