Empieza'l xuiciu escontra Cascos por apropiación indebida na so etapa como presidente de Foro

Ábrense seis xornaes de sesiones nes que tán citaos mediu centenar de persones

Empieza'l xuiciu escontra Francisco Álvarez-Cascos por apropiación indebida na so etapa como presidente de Foro Asturies. L'ex presidente del Principáu va declarar mañana, a les 10:00, na Audiencia Provincial d'Uviéu. Ábrense asina seis xornaes de sesiones, hasta'l 29 de xineru, nes que tán citaos mediu centenar de persones, ente testigos y péritos.

Francisco Álvarez-Cascos va sentase finalmente énte'l xuez un añu y siete meses dempués de lo previsto yá que la vista foi suspendida hasta en tres ocasiones. L'expresidente del Principáu ta acusáu d'un delitu siguíu d'apropiación indebida por cargar gastos personales al partíu.

La vista va allargase seis sesiones nes que tán llamaos a declarar mediu centenar de péritos y testigos. Ente ellos, l'actual presidenta de la formación, Carmen Moriyón, y el gruesu de l'anterior cúpula directiva de Foro Asturies. Tamién va declarar per videoconferencia Carmen Porto, la exmuyer d'Álvarez-Cascos.

Según la Fiscalía, Álvarez-Cascos caltuvo como máximu responsable de Foro un sistema de pagos basáu nel enfotu del que se valió pa cargar gastos ayenos a la so actividá política.

El ministeriu públicu, que pide una pena de tres años y mediu de cárcel, estima que se llegó a apoderar de 181.648 euros del partíu en cinco años pa pagar, ente otros gastos, entraes pa la Copa Davis, xuegos de videoconsola, billetes d'Ave o moblame.