Asturies va superar los 1.000 millones d'inversión en 2030 cola llei de ciencia

La norma da estabilidá a los investigadores y busca atraer talentu

El Principáu espera algamar los 1.075 millones d'euros añales n'inversión n'I+D+i pa 2030, tanto de financiamientu públicu como priváu, cola nueva llei de ciencia que foi aprobada esti miércoles na Xunta Xeneral con un ampliu consensu parlamentariu

Asina lo apuntó esti xueves en rueda de prensa'l viceconseyeru de Ciencia, Anovación, Investigación y Tresformamientu Dixital, Iván Aitor Lucas, minutos dempués de que'l presidente del Principáu, Adrián Barbón, roblara la llei nun actu al qu'asistió'l conseyeru, Borja Sánchez, anque ta de baxa dende fai daqué más d'un mes.

Unu de los oxetivos prioritarios de la norma ye "blindar la inversión pública" n'I+D+i, con una medría gradual del presupuestu del Principáu -qu'espera algamar los 237 millones d'euros pa 2030- y los d'otres instituciones públiques asturianes, hasta algamar el 1,25% del PIB de dientro de cinco años.

El viceconseyeru afitó que se trata d'estimaciones al nun ser posible conocer el total al que va xubir el PIB asturianu en 2030.

El 1,75% restante, según Aitor Lucas, tendrá de ser apurríu pol sector priváu, hasta completar el 3 por cientu del PIB autonómicu que la llei prevé pa 2030.

Anguaño, nos Presupuestos Xenerales del Principáu pa 2025, la partida pa I+D+i algama los 125 millones d'euros y la llei prevé una medría gradual, qu'anguaño va ser del 2,7% y va dir medrando hasta algamar el 4,6% pa 2030.

Ente otres midíes como la creación d'un cuerpu cimeru dedicáu a la investigación, que va ser el biltu del "CSIC asturianu", del rexistru del Sistema Asturianu de Ciencia, Tecnoloxía y Innovación (SACI) y del Observatoriu Asturianu de la Innovación, la llei prevé l'ampliación de cinco a siete años nos programes de retención y atracción de talentu.